الاكسسوارات العاطفيه

مقدرش اقول ان وجود الاكسسوارات فى حياتنا هو ضرورة قصوى من ضروريات الحياة اللى مش من الممكن ابدا الاستغناء عنها ولا الحياة هتقف من غيرها
بس لو كانت عندك القدرة انك تضيف لمسة لحياتك تديها روح احلى وتبقى نفسيا مرتاح اكتر وبالرغم من كدة مبتستخدمهاش يبقى انت بقى اللى غاوى ...................................
طبعا اللى هيقرى الكلام اللى فات هيتخيل انى بتكلم عن فازة جميلة تتحط فى ركن البيت ولا لوحة تتعلق على حيطة او حتى عقد ولا خاتم تلبسه ويغير شكلك
هو صحيح دى اكسسوارات لكنها ماديه .......ملموسة
لكن اللى بتكلم عنه هو الاكسسوارات المحسوسه..........النفسيه.......... العاطفيه
الحقيقة اللى جاب فى بالى الكلام دة بعد كلام كتير بعد مسلسل نور على ان الرومانسيه الزيادة دى فى الحياة ما بين الزوجين محدش فايقلها وان دة كلام فاضى وبعد ما شفت الفيلم الاجنبى (twilieght) وانبهرت شخصيا وشفت الانبهار دة نفسه فى عيون صاحباتى اللى شافوا الفيلم وعجبهم قوى حركات الولد لما خدها على ظهرة وطلع بيها على الشجر من فوق وشافوا منظر السما والحركات دى
وقلت لنفسى هو لما الزوج ميقدمش لزوجته ورد على طول ويعاملها برومانسيه طول الوقت يبقى كدة دة زوج سيء ولا لو مجاليش عريس هيعمل معايا زى الافلام وياخدنى على حصان ابيض ويجرى بينا على الشط ساعة الغروب (دة لانه اكيد مش هيعرف يطير بيا زى بطل الفيلم :) ) يبقى مينفعش زوج مناسب
من هنا جتلى فكرة ان الحاجات دى عاملة فى حياتنا زى الاكسسوارات
فى مننا اللى بيعتبرها جزء مهم لحياته لانه بيكملها ومن غيرة شكل كل حاجة هيبقى كانه ميت
وفى اللى بيعتبر ان الاكسسوارات مهمة بس يعنى مش لدرجة كبيرة قوى يعنى ممكن استغنى عنها فى اوقات
وفى بقى اللى ملوش فى الموضوع دة خاااااااااااااالص وبيعتبر ان الحاجات دى دلع وكلام فاضى وتضييع وقت وملهاش لازمة

والحقيقة انا من النوع التانى لان الحياة لاتنفع تبقى مسلسل روتينى ممل متكرر محسوب مبتغيرش فيه اى حاجة وانت فى المسلسل دة بتطلع تادى دورك زى الكتاب ما بيقول لا بتزود حرف ولا بنتقص حرف وكل يوم اللى بتقوله تعيده واللى بيتعيدة تزيدة واللى بتبات فيه بتصبح فيه وساعتها حياتك هتبقى جامدة.......واقفة........راكدة زى بركة ميه مفيهاش اى اثر لاى روح ولا حياة

ولا الحياة برضة تنفع انها تبقى على طول رومانسيه او لسعان ومفاجآت وتبقى ماشى مش عارف انت رايح فين وسايب نفسك للصدفة كدة وزى ما تيجى تيجى ومحلاها عيشة الحريه
ودة مش منطقى لان مفيش حياة كدة ولو فى اعتقد انها هتنتهى نهاية ماساويه لان الحياة لازم يكون فيها قدر كبير من الواقعية

انا شايفة ان مفيش مانع بين الوقت والتانى لو نكسر حواجز الملل والروتينيه والارهاق وضغوط الحياة باكسسوار جميل ورومانسى وهادى او حتى طاقق ولاسع او اكسسوار جديد على حياتنا مجربناهوش قبل كدة
يعنى ...... حاجة تلون بيها حياتك بلون جديد يخليك تقدر تشوف حياتك بعين تانيه تحببك فيها
نكهة جديدة تضيفها لطعم ايامك وتخليك تقدر تتقبل حياتك بكل ما فيها من مر و حلو

الاكسسوارات مهمه بس لازم نديها حجمها المناسب